"16 yanvar 1993-cü il Azərbaycan siyasi tarixində mühüm mərhələlərdən biri kimi yadda qalmışdır. Məhz həmin gün Sabirabad rayonunda Yeni Azərbaycan Partiyası (YAP)-nın təməli qoyulmuş, bölgədə yeni siyasi təşkilatlanmanın əsası yaradılmışdır.
"Sabirabadxəbər.az" xəbər verir ki, həmin dövr ölkə üçün olduqca mürəkkəb və gərgin illərlə xarakterizə olunurdu. Dövlət müstəqilliyinin ilk illərində yaşanan siyasi qeyri-sabitlik, iqtisadi çətinliklər və idarəetmə böhranı cəmiyyətin bütün təbəqələrində öz təsirini göstərirdi. Belə bir şəraitdə Yeni Azərbaycan Partiyasının ideyaları ətrafında birləşmək, sabitlik və inkişaf naminə təşkilatlanmaq xüsusi əhəmiyyət daşıyırdı.
Sabirabadda YAP-ın yaradılması prosesi də heç də asan baş tutmamışdır. Böyük çətinliklər və məhdud imkanlar şəraitində, uzun axtarışlardan sonra güclə bir məkan tapılaraq partiyanın ilk təsis konfransı təşkil edilmişdir. Bu konfrans soyuq, pəncərələri qırılmış, şəraiti son dərəcə ağır olan bir zalda keçirilmişdir. Lakin bütün bu çətinliklərə baxmayaraq, tədbirdə yüksək ruh yüksəkliyi hökm sürmüş, ideyaya inam və qətiyyət iştirakçıları bir araya gətirmişdir.
Təsis konfransında 200 nəfərə yaxın partiya fəalı iştirak etmişdir. Onların hər biri Yeni Azərbaycan Partiyasının ideyalarını dəstəkləyən, ölkənin gələcəyinə biganə qalmayan vətəndaşlar idi. Bu toplantı Sabirabad rayonunda siyasi həyatın yeni mərhələyə qədəm qoymasının başlanğıcı oldu.
Beləliklə, 16 yanvar 1993-cü il tarixində Sabirabad rayon təşkilatı yaradılaraq, respublikada ikinci YAP təşkilatı kimi fəaliyyətə başlamışdır. Bu fakt rayonun ölkənin siyasi həyatındakı fəal mövqeyini və təşəbbüskarlığını bir daha nümayiş etdirirdi.
Təşkilatın ilk sədri kimi Rüstəm Yunis oğlu Rüstəmov (1940–2012) seçilmişdir. O, bu məsul vəzifəni böyük əzmkarlıq və prinsipiallıqla icra etmiş, partiyanın rayon üzrə möhkəmlənməsi və genişlənməsi üçün əhəmiyyətli işlər görmüşdür. Onun rəhbərliyi dövründə təşkilat yalnız yerli səviyyədə deyil, respublikanın ümumi ictimai-siyasi həyatında da fəal iştirak etmişdir.
Rüstəm Rüstəmov öz fəaliyyəti ilə seçilən, prinsipial mövqeyi və sarsılmaz iradəsi ilə tanınan bir şəxsiyyət olmuşdur. O, qarşılaşdığı çətinliklərə, hətta həyatına edilən sui-qəsd cəhdinə baxmayaraq, seçdiyi yoldan dönməmiş, mübarizəsini davam etdirmişdir. Bu isə onun ideallarına sadiqliyinin və güclü xarakterinin bariz nümunəsidir.
Onun rəhbərliyi ilə Sabirabad rayon təşkilatı qısa müddətdə formalaşaraq güclü siyasi struktura çevrilmiş, partiyanın ideyaları geniş kütlələr arasında yayılmışdır. Bu gün də həmin dövrdə qoyulan təməl Sabirabadda Yeni Azərbaycan Partiyası-nın möhkəm və dayanıqlı fəaliyyətinin əsasını təşkil edir.
Beləliklə, 16 yanvar 1993-cü ildə atılan bu mühüm addım yalnız bir təşkilatın yaranması deyil, həm də Sabirabadın ictimai-siyasi tarixində yeni bir səhifənin açılması idi. Bu yolun başlanğıcında duran şəxslərdən biri olan Rüstəm Rüstəmov isə öz adı ilə bu tarixdə silinməz iz qoymuşdur.
Rüstəm Rüstəmovun əsasını qoyduğu ictimai-siyasi fəaliyyət bu gün də uğurla davam etdirilir. Onun yolunu layiqincə davam etdirən oğlu Varis Rüstəmov hazırda Yeni Azərbaycan Partiyası (YAP)-nın Sabirabad rayon təşkilatının sədri kimi fəaliyyət göstərir.
Varis Rüstəmov rəhbərlik etdiyi müddətdə partiyanın rayon təşkilatının fəaliyyətinin daha da gücləndirilməsi, üzvlərin fəallığının artırılması və gənclərin siyasi proseslərə cəlb olunması istiqamətində mühüm işlər həyata keçirir. Onun təşəbbüsləri nəticəsində rayonda partiyanın ideoloji xətti daha geniş kütlələr arasında təbliğ olunur, sosial layihələr və ictimai tədbirlər davamlı xarakter alır.
Beləliklə, Rüstəm Rüstəmovun vaxtilə başladığı yol bu gün Varis Rüstəmov tərəfindən uğurla davam etdirilir və Sabirabadda Yeni Azərbaycan Partiyası-nın mövqeyi daha da möhkəmlənir.
İntiqam Abdullayev.
