"Sabirabadxəbər " bildirir ki, Aqrar Xidmətlər Agentliyinin Aqrar Təlim Mərkəzi tərəfindən respublikanın müxtəlif bölgələrində qəhvəyi mərmər bağacığı ilə bağlı maarifləndirmə tədbirləri davam etdirilir. Maarifləndirmə tədbirləri çərçivəsində Bakı ilə yanaşı, Qusar, Xaçmaz, Ağstafa, Göygöl, Samux, Şəmkir, Quba, Qazax, Balakən, Şəki, Qax, Oğuz, Qəbələ, Zaqatala, Şabran, Tovuz və Gədəbəy rayonunun sakinləri ilə görüşlər təşkil olunub.
Görüşlərin əsas məqsədi qəhvəyi mərmər bağacığının kənd təsərrüfatına vurduğu zərərin qarşısının alınması, fermerlərin bu zərərverici ilə mübarizə sahəsində bilik və bacarıqlarının artırılması, eləcə də vaxtında və düzgün tədbirlərin görülməsinə dəstək göstərməkdir.
Tədbirlər çərçivəsində mütəxəssislər qəhvəyi mərmər bağacığının yayılma xüsusiyyətləri, bitkilərə vurduğu zərər, eləcə də effektiv mübarizə üsulları barədə ətraflı məlumat veriblər. Fermerlərə aqrotexniki tədbirlərin düzgün tətbiqi izah olunub, suallar cavablandırılıb və praktik tövsiyələr təqdim edilib.
Aqrar Təlim Mərkəzi tərəfindən həyata keçirilən bu cür maarifləndirici tədbirlər regionlarda aqrar biliklərin artırılması, məhsuldarlığın qorunması və zərərvericilərə qarşı vaxtında mübarizə tədbirlərinin görülməsi baxımından mühüm əhəmiyyət daşıyır.
