18 mart 2026-ci il tarixdə Saatlı Rayon İcra Hakimiyyətinin təşkilatçılığı ilə Heydər Əliyev meydanında xalqımızın zəngin mədəniyyətini, milli-mənəvi dəyərlərini özündə əks etdirən Novruz bayramı münasibətilə “Baharın gəlişi” adlı ümumrayon tədbiri keçirilib.
Tədbirdə Saatlı Rayon İcra Hakimiyyətinin başçısı Elmir Bağırov, hüquq-mühafizə orqanlarının, idarə və müəssisələrin rəhbərləri, şəhid ailələrinin üzvləri və rayon ictimaiyyəti iştirak edib. Əvvəlcə idarə, müəssisə və təhsil müəssisələri tərəfindən hazırlanmış sərgiyə baxış keçirilib, tədbir iştirakçıları meydanda nümayiş etdirilən rəsm əsərləri, milli adət-ənənələrimizi, bayram atributlarını və bahar əhval-ruhiyyəsini əks etdirən əl işləri, eləcə də milli mətbəx nümunələri ilə tanış olub.
Daha sonra bədii hissə ilə davam edən tədbirdə vətənpərvərlik və milli ruhda mahnılar ifa olunub, milli musiqi sədaları altında uşaqlardan ibarət rəqs qruplarının çıxışları şənliyə xüsusi rəng qatıb. Tədbirdə idmançılar və pəhləvanlar tərəfindən güc, çeviklik və məharət nümayiş etdirilən maraqlı nömrələr təqdim olunmuş, eyni zamanda kosa və keçəlin meydana gəlişi tədbir iştirakçıları tərəfindən rəğbətlə qarşılanmışdır.
N.Quliyeva
