Sağlamlıq - Sabirabadxeber.Az - İnformasiya Portalı

Əhalinin NƏZƏRİNƏ: Antibiotiklər pulsuz veriləcək? - AÇIQLAMA

Fri, 24 Apr 2026 20:18:03 +0400

Qrip və digər mövsümi virus infeksiyalarının yayıldığı dövrlərdə xəstələrin müalicəsi ilə bağlı müxtəlif təşəbbüslər irəli sürülür. Bu təşəbbüslərdən biri də antibiotiklərin pulsuz paylanması ideyasıdır. İlk baxışda sosial dəstək kimi qiymətləndirilən bu yanaşma, əslində həm tibbi, həm də iqtisadi baxımdan mübahisəli məqamlar doğurur və mütəxəssislər tərəfindən birmənalı qarşılanmır.

Bəs qrip zamanı antibiotiklərin pulsuz paylanması həqiqətən effektiv həll yoludur, yoxsa bu addım antibiotiklərin yersiz istifadəsini artıraraq daha ciddi problemlərə yol aça bilər?

"Sabirabadxəbər" xəbər verir ki, mövzu ilə bağlı Konkret.az-a açıqlama verən həkim-terapevt Günay Lətifova bildirib ki, antibiotiklərin nəzarətsiz və kütləvi şəkildə paylanması bir çox mənfi nəticələrə səbəb ola bilər. Onun sözlərinə görə, ilk növbədə bu, iqtisadi baxımdan böyük yük deməkdir:

“Burada ciddi maliyyə vəsaitindən söhbət gedir. Antibiotiklərin geniş şəkildə pulsuz verilməsi dövlət büdcəsinə mənfi təsir göstərəcək. Amma məsələ təkcə iqtisadi tərəflə məhdudlaşmır.

Daha böyük təhlükə antibiotiklərin yersiz istifadəsinin genişlənməsidir. Onsuz da cəmiyyətdə bu dərmanlara yanlış yanaşma mövcuddur.

Bu gün virus infeksiyasına yoluxan da, sadəcə asqıran da antibiotik qəbul edir. Halbuki bu, tamamilə yanlışdır. Qrip virus mənşəli xəstəlikdir və antibiotiklər viruslara təsir etmir”.

Günay Lətifova vurğulayıb ki, antibiotiklər yalnız bakterial infeksiyalar zamanı və orqanizm həmin bakteriyalarla mübarizə apara bilmədikdə istifadə olunmalıdır:

“İnsan özünü bir qədər halsız hiss etdikdə və ya yüngül narahatlıq yarandıqda dərhal antibiotik qəbul etməməlidir. Bu preparatlar yalnız konkret göstəriş olduqda tətbiq olunmalıdır.

Antibiotiklərin nəzarətsiz istifadəsi gələcəkdə daha ciddi problem – antibiotiklərə qarşı müqavimətin artması ilə nəticələnəcək. Bu isə o deməkdir ki, gələcəkdə ən sadə bakterial infeksiyaların müalicəsi belə çətinləşə bilər”.

Sonda həkim antibiotiklərin yalnız resept əsasında verilməsinin vacibliyini vurğulayıb. Onun fikrincə, düzgün yanaşma məhz maarifləndirmə, həkim müşahidəsi və dərman istifadəsinə ciddi nəzarətin təmin olunmasıdır.

Beləliklə, ekspert hesab edir ki, qrip zamanı antibiotiklərin pulsuz paylanması problemi həll etmək əvəzinə, daha böyük risklər yarada bilər

Evlənmək istəyən 700-dən çox şəxsdə talassemiya daşıyıcılığı aşkarlandı

Fri, 24 Apr 2026 15:23:38 +0400

2026-cı ildə nikah bağlamaq üçün müraciət edən və müvafiq olaraq analizlər götürülən 745 nəfərdə talassemiya daşıyıcılığı aşkarlanıb.

"Sabirabadxəbər" xəbər verir ki, bu barədə Səhiyyə Nazirliyi Milli Hematologiya və Transfuziologiya Mərkəzindən bildirilib.

Hazırda ölkəmizdə 3 190 nəfər talassemiya xəstəsinin rəsmi qeydiyyatda olduğu bildirilir. Pasiyentlər tam şəkildə dövlət hesabına müalicə və dərman preparatları ilə təmin olunurlar.

Qeyd edək ki, talassemiya valideynlərdən genetik olaraq keçən, qanda hemaqlobinin yaranmasına təsir edən genetik bir xəstəlikdir.

Sabirabad Rayon Mərkəzi Xəstəxanasında uğurlu cərrahi əməliyyat həyata keçirildi

Mon, 13 Apr 2026 21:30:54 +0400

Sabirabad Rayon Mərkəzi Xəstəxanasında 19 yaşlı qadın xəstə “sağ yumurtalıq kistası” və “kəskin appendisit” diaqnozları ilə əməliyyata alınıb.
Aparılan müayinələr nəticəsində xəstəyə sağ tərəfli overektomiya (yumurtalığın çıxarılması) və yanaşı appendektomiya əməliyyatı icra olunub. Yumurtalıq toxumasının qorunması mümkün olmadığından, tibbi göstərişə əsasən overektomiya tətbiq edilib.
Əməliyyat həkim heyətinin peşəkarlığı və koordinasiyalı fəaliyyəti sayəsində uğurla başa çatıb.
👩‍⚕️ Əməliyyatı icra edən: Dr. Zülfüyyə
👨‍⚕️ Assistent: Dr. Elnur Əzizov
💉 Anestezioloq: Dr. Zəfər Cəfərov

Əməliyyatda iştirak edən bütün tibb heyətinə təşəkkür edirik.

Yoluxma halları artır: "Ağ vəba" adlanan yeni təhlükə

Sat, 28 Mar 2026 15:41:21 +0400

ABŞ-də vərəm halları yenidən artmağa başlayıb.

"Sabirabadxəbər" xəbər verir ki, mütəxəssislər COVID-19-u üstələyərək yenidən ən ölümcül yoluxucu xəstəliklərdən birinə çevrilən xəstəlikdə antibiotik müqavimətinə diqqət çəkirlər.

ABŞ Xəstəliklərə Nəzarət və Profilaktika Mərkəzlərinin (CDC) məlumatları göstərir ki, 2025-ci ildə ölkədə 10.260 hal qeydə alınıb, bunlardan 967-si Nyu-Yorkda olub.

Xəstəliyin simptomlarının qrip və oxşar infeksiyalarla qarışdırıla bilməsi erkən diaqnozu çətinləşdirir.

ABŞ-də təxminən 13 milyon insanın gizli vərəm daşıyıcısı olduğu təxmin edilir.

Müalicə olunmadıqda, aktiv vərəm hallarının təxminən yarısı ölümlə nəticələnə bilər.

Vərəmə Qarşı Mübarizə Tərəfdaşlığının direktoru Dr. Lucica Ditiu riskin qlobal miqyasını vurğulayıb:

“Dünyada vərəmi tamamilə aradan qaldıran və ya ondan azad olan heç bir ölkə yoxdur. Nəfəs aldığımız müddətcə hamımız risk altındayıq”.

Azərbaycanda böyrək xəstələri ilə bağlı qorxunc statistika –VİDEO

Wed, 25 Mar 2026 20:30:22 +0400

Azərbaycanda böyrək xəstələrinin sayı ilbəil artır. Hətta onların arasında yeni doğulmuş və yetkinlik yaşına çatmayan uşaqlar da var. 2011-ci ildən bu günə qədər 56 uşağa böyrək köçürmə əməliyyatı həyata keçirilib. Bunlardan ən kiçiyinin 4 yaşı var.

"Sabirabadxəbər" Xezerxeber.-ə istinadən xəbər verir ki, Səhiyyə Nazirliyinin mütəxəssisi, həkim nefroloq Hikmət İsmayılovun sözlərinə görə, son illərdə xroniki böyrək xəstəliklərinin gəniş yayılması mütəxəssisləri narahat edir.

Böyrək xəstəliyinin yaranmasında ilk sırada şəkərli diabet əsas yer tutur. Bundan başqa bir sıra xəstəliklər də var ki, böyrəyin funksiyasının zəifləməsinə gətirib çıxarır. Bu xəstəliklərdən əziyyət çəkənlər risk qrupuna daxildirlər.

Hikmət İsmayılov bildirib ki, xroniki böyrək xəstəliyinin törədici səbəbindən, mərhələsindən və inkişaf dərəcəsindən asılı olaraq bəzən xəstədə heç bir şikayət müşahidə olunmaya bilər. Bununla yanaşı, böyrək nahiyəsində ağrılar, tez yorulma, halsızlıq, iştahasızlıq, ödəmlər, yüksək arterial təzyiq, ürəkbulanma və qusma kimi əlamətlər də müşahidə oluna bilər. Eyni zamanda narahat ayaqlar sindromu, qaşınma, əzələ qıcolmaları kimi şikayətlər də mümkündür.

N.Quliyeva

Meymunçiçəyi virusuna yeni yoluxma qeydə alınıb

Tue, 24 Mar 2026 22:12:27 +0400

Rusiyanın Sankt-Peterburq şəhərində meymunçiçəyi virusuna yeni yoluxma qeydə alınıb.

"Sabirabadxəbər" xəbər verir ki, xəstənin S.P.Botkin Xəstəxanasında müalicə olunduğu bildirilib.

Qeyd edək ki, meymunçiçəyi virusuna yoluxma bundan əvvəl də Sankt-Peterburqda və Moskva vilayətində aşkar edilib. Ötən il qeyd edilən regionlarda üç nəfərə meymunçiçəyi diaqnozu qoyulub.

N.Səmədova

Darçınlı suyun faydaları

Tue, 24 Mar 2026 09:50:29 +0400

Hər gün nizamlı su istehlak etmək ümumi sağlamlığımızı qorumaqla yanaşı, orqanlarımızın və dərimizin sağlamlığı üçün də böyük əhəmiyyət kəsb edir.

"Sabirabadxəbər" xəbər verir ki, suyu sadə formada içməkdənsə, ona bəzi ədviyyatlar qatın. Suya darçın əlavə etmək sizi artıq çəkidən xilas edəcək. Darçın suyu maddələr mübadiləsini sürətləndirməyə kömək edir və yağların yandırılmasını dəstəkləyir. Bir araşdırma göstərib ki, darçın termogenezi (bədənin istilik istehsalını) 20%-ə qədər artırır ki, bu da daha çox kalori yandırmağa kömək edir.

Darçın iştahı və istəkləri azaldır, qeyri-sağlam qidaların istehlakını idarə etməyə kömək olur. Nəhayət, darçın suyu yağların və karbohidratların həzminə kömək edir, bu qidaların bədəndə yağ kimi yığılmasının qarşısını alır. Sağlam pəhriz və idmanla birləşdirildikdə darçınlı su arıqlamaq üçün təsirli bir üsuldur.

Qazana 1 litr su tökün, 6 darçın çubuğu əlavə edin və dəmlənməsini gözləyin. Darçın suya dadını və rəngini verəndən sonra istehlak edə bilərsiniz. İstəyirsinizsə, mixək və ya limon da əlavə edə bilərsiniz. Gündə 3 dəfə içmək məsləhətdir.

Darçınlı su içmək ümumi sağlamlığınızı yaxşılaşdırmaq və eyni zamanda arıqlamaq üçün də əla bir yoldur. Bu, təbii içkinin nə qədər faydalı olduğuna inanmayacaqsınız. Bu, ləzzətli içki yalnız arıqlamağa kömək etmir, həm də gündəlik fəaliyyətiniz aktivləşdirir.

Darçın suyu tüpürcək və həzm fermentlərinin istehsalını stimullaşdırmaqla həzmi yaxşılaşdırmağa kömək edə bilər. Darçın həm də yağlı qidaları parçalayaraq həzmə kömək edir.

Yeməkdən əvvəl darçınlı su içmək şişkinlik və qaz kimi simptomları, həmçinin ürəkbulanma və mədə yanmasını azaltmağa kömək olur. Bundan əlavə, darçın bağırsaqdakı zərərli bakteriyaları öldürə bilən təbii antiseptikdir. Bu, həzm sisteminizin sağlam olmasına və düzgün işləməsinə kömək edə bilər.

Yatmadan əvvəl darçınlı su içməyin yuxu keyfiyyətini yaxşılaşdırmağa və əzələləri rahatlamağa kömək etdiyi sübut olunub.

N.Quliyeva

Gün ərzində neçə stəkan çay içmək tövsiyə olunur?

Tue, 24 Mar 2026 09:00:31 +0400

"Çay istehlakının təhlükəsiz həddi gündə 3-5 stəkan arasındadır".

"Sabirabadxəbər" xəbər verir ki, bu barədə rusiyalı nutrisioloq Anastasiya Efimova deyib.

Qeyd olunub ki, həm qara, həm də yaşıl çayın müntəzəm istehlakı insult və ürək-damar ölümü riskini azaldır.

"Məsələn, gündə iki-üç stəkan yaşıl çay içmək insult riskini təxminən 10-15% azaldır və daha müntəzəm istehlakla azalma 20%-ə yüksələ bilər. Bu məlumatlar Yaponiya və digər ölkələrdəki əhali arasında aparılan müşahidələrlə təsbit olunub", - deyə həkim bildirib.

Mütəxəssisin sözlərinə görə, içkinin həddindən artıq istehlakı da müxtəlif mənfi nəticələrə səbəb ola bilər. Yuxu pozuntusuna meyilli olanlar üçün günortadan sonra çay içmək tövsiyə edilmir. Bildirilib ki, çayın çox içilməsi narahatlıq, taxikardiya və yuxu pozuntularına şərait yarada bilər.

N.Quliyeva

Səhiyyə Nazirliyindən əhaliyə ÇAĞIRIŞ

Sun, 22 Mar 2026 23:00:29 +0400

Qarşıdakı istirahət günlərində respirator xəstəliklərin və mövsümi qrip hallarının artması qaçılmazdır.

"Sabirabadxəbər" Xezerxeber.az-a istinadən xəbər verir ki, Səhiyyə Nazirliyi də vətəndaşlara kütləvi tədbirlərdə fərdi qoruyucu vasitələrdən istifadə etməyi, əl gigiyenasına xüsusi diqqət yetirməyi və ən əsası vitaminlərlə zəngin qidalanmağı tövsiyə edir.

İnfeksionist Mərdan Əliyev deyir ki, ümumi olaraq qrip adlandırsaq da, 200-ə qədər fərqli növ virusa yoluxma mümkündür.

İnfeksionist bildirib ki, mart ayında temperaturun kəskin enib-qalxması bədən üçün bioloji stress yaradır. Bu da insanı viruslar qarşısında müdafiəsiz qoyur.

Mərdan Əliyev əlavə edib ki, bayram günlərini xəstə yatağında keçirməmək üçün təkcə maska və gigiyena kifayət deyil. Eyni zamanda yuxu rejiminə və düzgün geyimə də diqqət etmək vacibdir.

N.Səmədova

Son vaxtlar Azərbaycanda yayılan xəstəlik nədir?

Sat, 21 Mar 2026 21:20:10 +0400

Son günlər əhali arasında geniş yayılan və müxtəlif əlamətlərlə müşahidə olunan xəstəlik narahatlıq doğurur. Bir çox insan uzun müddət davam edən qripəbənzər simptomlardan şikayət edir, bəzilərində isə xəstəlik fərqli formalarda özünü göstərir və sağaldıqdan sonra yenidən qayıtdığı iddia olunur.

"Sabirabadxəbər" xəbər verir ki, infeksionist Mərdan Əliyev mövzu ilə bağlı Oxu.Az-a danışıb.

O qeyd edib ki, hazırda müşahidə olunan xəstəliklər, əsasən, kəskin respirator virus infeksiyaları ilə bağlıdır:

"Bu qrup xəstəliklərə qripəbənzər infeksiyalar daxildir və adətən, burun axması, boğaz ağrısı, öskürək, burun tutulması və bir çox hallarda qızdırma ilə müşahidə olunur. Daha ağır hallarda isə əzələ və sümük ağrıları da yarana bilər".

Həkim qeyd edib ki, insanlar arasında müxtəlif əlamətlərin müşahidə olunması tək bir virusla bağlı olmaya bilər:

"Bu əlamətlər bir virusun əlaməti olmaya bilər. Çünki bəzən eyni vaxtda bir neçə virus dövrədə olur. Ümumiyyətlə, bu qrup xəstəlikləri təxminən 200-ə qədər virus törədir. Bu səbəbdən insan bir virusdan sağaldıqdan sonra digərinə də yoluxa bilər".

Onun sözlərinə görə, bəzi hallarda müşahidə olunan göz qızartısı adenovirus infeksiyasına xas əlamətlərdən biri hesab olunur:

"Bu zaman qızdırma və gözdə qızartı müşahidə olunur ki, buna konyunktivit deyirik. Eyni zamanda, burun axması və digər əlamətlər də olur. Bu, adətən, uşaqlarda daha yüksək qızdırma verir. Boğaz ağrısı, bəzən angina kimi hallar da müşahidə edilə bilər".

İnfeksionist əlavə edib ki, bəzi xəstələrdə səs tutulması da qeydə alınır və bu daha çox paraqrip virusları ilə əlaqəli olur:

"Bundan əlavə, influenza, yəni mövsümi qrip virusu da daha ağır gedişlə müşahidə oluna və əzələ ağrıları ilə özünü göstərə bilər".

Həkim insanların tez-tez xəstələnməsi və ya xəstəliyin yenidən qayıtması məsələsinə də aydınlıq gətirib:

"Bu, əksər hallarda eyni virusun təkrarlanması ilə deyil, müxtəlif viruslara dalbadal yoluxma ilə bağlı olur. İnsan bir virusa yoluxur və həmin vaxt immun sistemində zəifləmə müşahidə olunur. Bu səbəbdən növbəti virusa daha asan yoluxa bilər. Eyni virusa qısa müddətdə yenidən yoluxma çox rast gəlinən hal deyil. Çünki xəstəlikdən sonra orqanizmdə müəyyən immunitet yaranır, anticisimlər əmələ gəlir".

Mütəxəssis vətəndaşlara mövsümi virus infeksiyalarından qorunmaq üçün gigiyena qaydalarına riayət etməyi, xəstə şəxslərlə təmasdan mümkün qədər uzaq durmağı və simptomlar uzun müddət davam edərsə, həkimə müraciət etməyi tövsiyə edib.

N.Səmədova