🛠 Sabirabadın Xəlfəli kəndində qaz borularının dəyişdirilməsi işləri aparılıb
Azəriqazın mətbuat xidmətindən "Sabirabadxəbər.az" a verilən məlumata görə Sabirabad rayon Xəlfəli kənd ərazisində qaz xətlərinin təhlükəsizlik tədbirləri görülüb.
Sabirabad rayonunun Xəlfəli kəndi ərazisindən keçən qaz xətləri üzrə təhlükəsizlik tədbirləri çərçivəsində təmir-bərpa işləri həyata keçirilib. Kəndin ərazisindən keçən və 2-ci dərəcəli avtomobil yolunun keçid hissəsində qəzalı vəziyyətdə olan qaz boruları tam şəkildə dəyişdirilib.
Məlumata görə, söhbət təxminən 500 metr uzunluğunda qaz xəttindən və hər biri 25–27 metr uzunluğunda olan boru seqmentlərindən gedir. Texniki baxış zamanı boruların korroziyaya uğraması və təhlükəsizlik riskləri yaratması müəyyən edildiyindən, müvafiq qurum tərəfindən dərhal tədbirlər görülüb.
Aparılan işlər zamanı:
Qəzalı vəziyyətdə olan köhnə borular sökülüb,
Müasir standartlara cavab verən yeni borularla əvəzlənib,
Yol keçidi hissəsində əlavə mühafizə tədbirləri görülüb,
Qaz sızması və yol hərəkəti üçün yarana biləcək risklər aradan qaldırılıb.
Təmir işləri ərazidə yaşayan sakinlərin təhlükəsizliyinin təmin olunmasına, qaz təchizatının daha dayanıqlı və fasiləsiz həyata keçirilməsinə xidmət edir. Qeyd olunur ki, gələcəkdə oxşar risklərin qarşısının alınması üçün qaz xətləri üzrə mərhələli monitorinq tədbirləri davam etdiriləcək.